Уулзалтыг нээж Жендэрийн үндэсний хорооны Нарийн бичгийн дарга бөгөөд Ажлын албаны дарга А.Адилбиш, Европын холбооноос Монгол Улсад суугаа Онц бөгөөд Бүрэн эрхт Элчин сайд Ина Марчюлёните үг хэлж мэндчилгээ дэвшүүллээ.

Жендэрийн үндэсний хорооны Нарийн бичгийн дарга бөгөөд Ажлын албаны дарга А.Адилбиш хэлэлцүүлгийг нээж хэлсэн үгэндээ, “Жендэрт суурилсан хүчирхийлэлтэй тэмцэх 16 хоногийн аян”-ны хүрээнд технологид суурилсан хүчирхийллийн талаарх ойлголт, мэдээллээ нэг түвшинд хүргэн, иргэдийн мэдлэг, хандлагыг дээшлүүлэх, үндэсний хэмжээнд статистик судалгааг тогтмол хийж, хууль сахиулагч болон төрийн албан хаагчдын мэдлэг, ур чадварыг нэмэгдүүлэхэд анхаарах, мөн энэ төрлийн гэмт хэргийн хохирогчдод дэмжлэг үзүүлэх, туслах замын зураглалыг асуудал хариуцсан холбогдох байгууллагууд хамтдаа боловсруулах хэрэгтэйг онцолсон.

Европын Холбооноос Монгол Улсад суугаа Элчин сайд, хатагтай Ина Марчюлёните охид эмэгтэйчүүдийн хүчирхийллийн эсрэг болон технологи ашиглан үйлдэгдэж буй жендэрт суурилсан хүчирхийллийн эсрэг шинээр боловсруулагдан хэрэгжиж буй Европын холбооны хууль тогтоомжууд, Европын Холбооны гишүүн улсуудын сайн туршлагын талаар мэдээлэл хуваалцав. Мөн Европын Холбоо, ХБНГУ-ын дэмжлэгээр хэрэгжүүлсэн хуурамч мэдээллийн Монгол Улс дахь нөхцөл байдлын талаарх судалгааны дүгнэлтийг танилцуулсан бөгөөд УИХ-ын гишүүд худал мэдээлэлтэй тэмцэх, хэвлэлийн эрх чөлөөг нэмэгдүүлэх чиглэлээр өөрсдийн туршлагаа хуваалцан, цаашид хамтран ажиллах боломжийн талаар ярилцлаа.

Хэлэлцүүлгийн нэгдүгээр хэсэгт IRIM хараат бус судалгааны хүрээлэнгээс “МОНГОЛ УЛС ДАХЬ ХУУРАМЧ МЭДЭЭЛЛИЙН ЗУРАГЛАЛЫН СУДАЛГААНЫ ҮР ДҮН”-г танилцуулсан бөгөөд Монгол дахь хуурамч мэдээллийн нөхцөл байдал, хуурамч мэдээллийн хувь хүн болон нийгэмд үзүүлж буй нөлөө, Монгол Улс хуурамч мэдээлэлтэй тэмцэх чиглэлээр ямар арга хэмжээнүүдийг авч хэрэгжүүлж байгаа талаар оролцогчдод мэдээлэл өгөв.

Хэлэлцүүлгийн хоёрудгаар хэсэг санал солилцох, асуулт хариултын хэлбэрээр зохиогдсон бөгөөд Тинк бридж консалтинг ХХК-ийн гүйцэтгэх захирал Ч.Болортуяа удирдан чиглүүлж, УИХ-ын гишүүн А. Ариунзаяа, УИХ-ын гишүүн Х.Баасанжаргал, УИХ-ын гишүүн, Тогтвортой хөгжлийн зорилгын дэд хорооны дарга Б.Уянга, УИХ-ын гишүүн Б.Мөнхсоёл нар худал мэдээлэлд хэрхэн өртсөн талаар түүх, цаашид анхаарах асуудал, эмэгтэйчүүдийн шийдвэр гаргах түвшний оролцоо, манлайллын талаарх нийгэм дэх жендэрийн хэвшмэл ойлголтыг залруулах арга, туршлагынхаа талаар санал солилцож,цаашдын хамтын ажиллагааны талаар ярилцлаа.